ᑕᐅᑐᒐᕆᔭᐅᔪᑦ

ᐃᓕᑦᑎᖃᑕᐅᒋᑦ ᐊᔾᔨᒌᖏᓂᖏᓐᓂᒃ ᓴᓂᑭᓗᐊᑉ ᕿᑭᖅᑕᖏᓐᓂᒃ ᑲᔪᓯᔪᓂᒡᓗ ᐱᓕᕆᐊᕆᔭᐅᔪᓂ ᐊᑐᓕᖅᑎᑦᑎᕙᓪᓕᐊᓂᖏᓐᓄᑦ ᑕᐅᑐᒐᕆᔭᐅᔪᓂᒃ ᓄᓇᓕᖕᓄᑦ−ᐊᐅᓚᑕᐅᔪᑦᓂᒃ ᓴᐳᓐᓂᐊᖅᑕᐅᓯᒪᕝᕕᒃᓴᖏᑦ.

ᐊᔾᔨᒌᖏᑦᑐᒻᒪᕆᒃ ᑕᒪᓐᓇ ᓄᓇᖓᑦ

ᕿᑭᑦᑕᐃᑦ

ᓴᓂᑭᓗᐊᕐᒥ ᕿᑭᖅᑕᐃᑦ − ᖁᒻᒧᐊᒃᑎᑕᐅᓯᒪᔪᑎᒍᑦ ᐊᔾᔨᖑᐊᖅ

ᐊᔾᔨᖃᖏᓂᖏᑦ ᕿᑭᖅᑕᐃᑦ ᓴᓂᑭᓗᐊᑉ ᐊᕙᑎᐊᓂ ᖃᓂᒋᔭᖏᑦ ᓄᓇᑯᓗᖏᓗ ᐃᓕᑕᕐᓇᑲᐅᑎᒋᕗᑦ ᓄᓇᖑᐊᕐᒥ ᑕᑯᓪᓗᒋᑦ, ᐊᔾᔨᓕᐅᖅᑕᐅᓯᒪᔪᓂᒡᓗᓐᓃᑦ ᖁᒻᒧᐊᒃᑎᑕᐅᓯᒪᔪᓂᒃ. ᐊᔾᔨᖃᖏᒻᒪᑕ ᑕᒪᐃᓕᖓᔪᓂᒃ ᓄᓇᕐᔪᐊᕐᓕᒫᒥ! ᑕᒫᓃᓪᓚᕆᖕᒪᑦ ᕼᐊᑦᓴᓐᐲᑉ ᑕᓯᐅᔭᕐᔪᐊᖓᓂ, ᕿᑭᖅᑕᖏᑦ ᐊᒻᒪᓗ ᑕᕆᐅᖓᑕ ᐊᐅᓚᕙᖕᓂᖓ ᖃᐅᔨᒋᐊᕐᕕᐅᕋᑦᑕᕐᓂᖏᑦ ᐊᖏᓂᖅᓴᒥᒃ ᖃᓄᐃᓕᖓᓂᖓᓂᒃ ᕼᐊᑦᓴᓐᐲᑉ ᐊᕙᑎᖓᓂᒃ ᐊᕙᑎᒥᐅᑕᕆᔭᖏᓐᓂᓗ ᑕᒪᐃᓐᓂ.

ᐆᒪᔪᓕᕆᓂᖅ

ᕿᑭᖅᑕᐃᑦ ᐊᒥᓱᓂᒃ ᐊᔾᔨᒌᖏᑦᑑᑎᐅᔪᓂᒃ ᐱᑕᖃᓲᖅ ᑕᕆᐅᕐᒥᐅᑕᓂᒃ ᐆᒪᔪᓂᒃ, ᓄᓇᒥᐅᑕᓂᒡᓗ, ᐊᐅᔭᒃᑯᓪᓗ ᑎᑭᓯᒪᕙᒃᑐᓂᒃ, ᑕᐅᕙᓃᓲᖑᔪᓂᒡᓗ ᐃᓚᖏᓐᓂ ᐊᕐᕌᒍᓕᒫᖅ, ᓄᖃᖓᕝᕕᐅᖃᑕᐃᓐᓇᖅᑐᓂᒃ ᑕᐅᕗᓈᖅᐸᓪᓕᐊᓂᖏᓐᓂ ᐆᒪᔪᐃᑦ. ᕼᐊᑦᓴᓐᐲᒥ ᒥᑏᑦ ᑕᐅᕙᓃᖃᑕᐃᓐᓇᓲᑦ, ᐅᓪᓗᖃᓲᖑᓪᓗᑎᒃ ᕿᑭᖅᑕᓂ, ᐅᑮᕙᒃᓱᑎᒡᓗ ᓯᓈᓂ ᐊᒻᒪᓗ ᓯᑯᔪᐃᑦᑐᓂ ᐃᑭᕋᓴᖓᓂ. ᕿᑭᖅᑕᐃᑦ ᓴᐳᓐᓂᐊᕐᕕᐅᓂᐊᖅᑐᑦ ᐆᒪᔪᓂᒃ ᑕᒪᒃᑯᓂᖓ ᒥᑎᕐᓂᒃ ᓄᓇᒥ ᐊᒻᒪᓗ ᑕᕆᐅᕐᒥ, ᐊᕐᕋᒍᓕᒫᖅ.

ᐃᓕᖅᑯᓯᖏᑦ

ᓴᓂᑭᓗᐊᕐᒥᐅᑦ ᕿᑭᖅᑕᒥᐅᑕᐃᑦ − ᑕᒪᒃᑯᓄᖓ ᓱᖏᐅᑎᓯᒪᑦᑎᐊᖅᓱᑎᒃ, ᓄᓇᒥᓄᑦ ᐊᖏᕐᕋᕆᔭᖏᓐᓄᑦ. ᑐᒃᑐᖃᕈᓐᓃᓚᐅᕐᓂᖓᓄᑦ ᐊᑐᕆᐊᖃᓕᓚᐅᖅᑐᑦ ᐊᓐᓄᕌᓕᐅᖃᑕᕐᓂᕐᒧᑦ ᒥᑎᕐᓂᒃ ᓴᓇᓯᒪᔪᓂᒃ ᐊᒻᒪᓗ ᓂᕿᒃᓴᖃᓕᖅᓱᑎᒃ ᐊᕐᕌᒍᓕᒫᖅ ᑕᒪᒃᑯᓂᖓ, ᑕᐃᒪᐃᓂᖓᓄᓪᓗ ᐊᔾᔨᐅᖏᑦᑐᒥᒃ ᐃᓕᖁᓯᖃᕈᑕᐅᕗᑦ ᑕᒪᑯᐊ ᑐᖓᕕᖃᖅᓱᑎᒃ ᒥᑎᕐᓂᒃ, ᓄᓇᕐᔪᐊᕐᓕᒫᒥ ᐅᖁᖅᓂᖅᐹᖑᓪᓗᑎᒃ ᑕᒪᐃᓐᓂᓕᒫᖅ ᖁᓂᕈᖃᕐᓲᖑᔪᓂᒃ ᓄᓇᕐᔪᐊᓕᒫᒥ.

ᑕᕆᐅᕐᒥ ᓯᑯᐊᓘᑉ ᐊᕙᑎᖓᑦ ᐊᕙᑎᒥᐅᑕᕆᔭᖏᓪᓗ

ᐊᔾᔨᖃᖏᓂᖏᑦ ᖃᓄᐃᑦᑑᓂᖏᑦ ᑕᐅᕙᓂ ᕿᑭᖅᑕᐃᑦ ᐱᐅᔫᑎᔪᐊᕐᒪᕆᐊᓗᖕᓂᒃ ᓇᔪᖅᑕᐅᕙᒃᐳᑦ ᐊᔾᔨᒌᖏᑦᑐᓄᑦ ᐆᒪᔪᕐᓄᑦ, ᐱᓗᐊᖅᑐᒥᒃ ᑕᐅᕙᓂ ᑎᓂᖓᕙᓐᓂᖓᓂᒃ ᓯᓈᓂ ᐊᑐᓂ ᐃᒡᓗᑐᑦ ᐊᒻᒪᓗ ᐃᑭᕋᓴᖏᓐᓂ ᓯᑯᔪᐃᑦᑐᒥ ᐅᖓᑕᓃ 20−ᓂᒃ ᐱᑕᖃᕐᒪᑕ, ᐃᒪᑦᑎᐊᕙᖃᕈᑕᐅᕙᒃᑐᖅ ᐅᑭᐅᒃᑯᑦ ᓯᑯᒥ ᐆᒪᔪᕐᓄᑦ ᐊᒻᒪᓗ ᒥᑎᕐᓄᑦ.

ᐊᔾᔨᒋᔭᐅᖏᑦᑐᒥᒃ ᑕᐅᑐᒐᖃᕐᓂᖅ

ᓇᐅᑦᑎᖅᑐᐃᔨᖃᕈᑕᐅᔪᑦ ᓯᕗᓂᒃᓴᒧᑦ ᐃᓅᔪᒪᖅᑐᓄᑦ

ᓇᐅᑦᑎᖅᑐᐃᔨᖃᕈᑕᐅᔪᑦ ᓯᕗᓂᒃᓴᒧᑦ ᐃᓅᔪᒪᖅᑐᓄᑦ

ᐊᑯᓂᐊᓘᓕᖅᑐᖅ, ᓴᓂᑭᓗᐊᕐᒥᐅᑦ ᑐᑭᓯᓇᑦᑎᐊᖅᑐᓂᒃ ᐃᖕᒥᓄᑦ ᑕᐅᑐᒐᖃᐃᓐᓇᕐᒪᑕ ᓴᐳᓐᓂᐊᖅᑕᐅᖁᔨᓂᖅ ᑕᒪᐃᓐᓂᑦᑎᐊᖅ ᕿᑭᖅᑕᖁᑎᖏᓐᓂᒃ, ᑕᒪᒃᑯᓇᓂ ᐃᒪᕐᒥᐅᑕᓂᒃ ᐊᕙᑎᖏᓐᓂᒡᓗ ᐊᒻᒪᓗ ᓄᓇᒥᐅᑕᓂᒃ ᐆᒪᔪᓂᒃ ᐊᕙᑎᖏᓐᓂᒡᓗ, ᐱᑕᖃᐃᓐᓇᖁᓪᓗᒋᑦ ᓯᕗᓂᒃᓴᒥ ᐃᓅᔪᒫᖅᑐᓄᑦ. ᑕᐃᒪᖓᑦ 2018−ᒥᒃ ᑕᒪᐃᓐᓂᒃ−ᓄᓇᓖᑦ ᐃᑲᔪᖃᑕᐅᒋᐊᓕᓚᐅᖅᑐᑦ ᐃᓚᒋᔭᐅᓗᑎᒃ ᓴᓂᑭᓗᐊᕐᒥ ᕿᑭᖅᑕᐃᑦ ᑐᑭᒧᐊᒃᑏᑦ ᑲᑎᒪᔨᕋᓛᖏᓐᓄᑦ ᐃᑲᔪᖅᓱᐃᓂᕐᒧᑦ ᑲᑎᒪᓂᐊᓕᕌᖓᒥᒃ ᒐᕙᒪᒃᑯᓐᓂ ᐊᕕᒃᑐᖅᓯᒪᓂᖓᓂᓗ ᑎᒥᖁᑎᒋᔭᐅᔪᓂᒃ.

ᓇᐅᑦᓯᑦᑐᖅᑏᑦ

ᓴᓂᑭᓗᐊᕐᒥ ᑕᐅᑐᒐᖃᕋᒥᒃ ᐅᔾᔨᖅᑐᑦᓯᐊᕈᒪᓂᖅ ᕿᑭᖅᑕᓂᒃ ᑕᒪᒃᑯᓂᖓᓗ ᐃᖃᓇᐃᔮᒃᓴᓂᒃ, ᐱᓕᕆᐊᒃᓴᓂᒡᓗ ᐃᓚᐅᓗᑎᒃ ᐊᖑᓇᓱᒃᑏᑦ, ᐃᓐᓇᑐᖃᐃᓪᓗ, ᒥᖅᓱᖅᑎᑦ ᐊᓯᖏᓪᓗ ᖃᐅᔨᒪᔨᑕᐃᑦ ᒪᓕᒃᑕᐅᔪᓐᓇᖅᑐᓂᒃ ᐃᓕᖅᑯᓯᑐᖃᓕᕆᓂᕐᒥᒃ ᐊᒻᒪᓗ ᐊᕙᑎᓂᒃ ᓇᐅᑦᓯᑐᖅᑕᐅᓂᖏᓐᓂ, ᐊᒻᒪᓗ ᐃᓚᐅᑎᑕᐅᓂᖏᓐᓂ ᒪᒃᑯᒃᑐᑦ ᐱᓇᓱᐊᕈᑎᖃᖅᓱᑎᒃ. ᐱᖃᓯᐅᔾᔨᒋᕗᑦ ᐊᕐᕌᒍᓕᒫᖅ ᐃᓚᐅᑎᑕᐅᕙᖕᓂᖏᓐᓂᒃ ᐊᖑᓇᓱᒃᑏᑦ ᑎᑎᕋᖅᑕᐅᕙᓪᓕᐊᓂᖏᓐᓂ ᐆᒪᔪᓕᕆᔪᓄᑦ ᐊᒻᒪᓗ ᓄᓇᒥ−ᐊᐅᓪᓚᖅᓯᒪᓂᖏᓐᓂ ᐱᓕᕆᐊᖑᕙᒃᑐᓂᒃ, ᐊᑐᖅᓱᑎᒃ ᐊᑐᒐᒃᓴᐅᕙᓕᖅᑐᓂᒃ ᐊᓲᕐᓗ ᑕᐃᒃᑯᓂᖓ ᑕᐃᔭᐅᔪᓂᒃ ᓯᑯ, ᖃᕆᑕᐅᔭᓖᑦ ᓴᓇᔭᐅᓚᐅᖅᑐᑦ ᓴᓂᑭᓗᐊᕐᒥ ᐊᑐᕈᓐᓇᓕᖅᑐᑦ ᓄᑖᓂᒃ ᒫᓐᓇᐅᔪᖅ ᐊᖑᓇᓱᒃᑏᑦ ᓇᐅᑦᓯᑦᑐᖅᑏᓪᓗ ᓄᓇᒦᓐᓂᖏᓐᓂᒃ ᓇᐅᑦᓯᑐᕐᓂᖏᓐᓂ ᑕᑯᕙᓪᓕᐊᔭᖏᓐᓂᓪᓗ ᑕᒡᕙᑲᐅᑎᒋ ᑐᓴᐅᒪᑎᑦᑎᔪᓐᓇᕐᓂᖏᓐᓂᒃ ᐊᖑᓇᓱᑦᑕᖏᓂᓗᓐᓃᑦ ᓇᐅᑦᓯᖅᑐᐃᔨᐅᑎᑕᐅᓗᑎᒃ.

ᓄᓇᓕᖕᓄᑦ−ᐊᐅᓚᑕᐅᔪᑦ ᖃᐅᔨᓴᖅᑕᐅᕙᑦᑐᑦ

ᓴᓂᑭᓗᐊᖅ ᓯᕗᓪᓕᐅᕗᖅ ᓄᓇᕐᔪᐊᕐᒥ ᓄᓇᓕᑐᖃᕐᓂᒃ−ᐊᐅᓚᑦᑎᔨᖃᖅᑐᓂᒃ ᐱᒋᐊᖅᑳᖅᓚᐅᖅᓯᒪᔪᑦ ᑕᐃᔅᓱᒪᓂ ᑕᐃᔭᐅᕙᓚᐅᖅᑐᓂᒃ ᓂᐱᖏᑦ ᑕᓯᐅᔭᕐᔪᐊᕐᒥᐅᑦ, ᐊᐅᓚᑕᐅᓚᐅᖅᑐᓂᒃ−ᓄᓇᓕᖕᓄᑦ ᐋᕿᐅᒪᓂᖏᓐᓂ ᖃᐅᔨᓴᖅᑎᐅᖃᑎᒌᒃᑐᑦ ᐱᓕᕆᖃᑎᒌᖕᓂᖏᓐᓂ ᐊᒻᒪᓗ ᕼᐊᑦᓴᓐᐱᒥ ᑲᑐᔾᔨᖃᑎᒌᖏᓐᓂᒃ ᐃᓚᖃᖅᓱᑎᒃ. ᐊᔾᔨᐅᖏᑦᑐᓂᒃ ᕿᑭᖅᑕᖏᑦ ᐃᒪᖁᑎᖏᓪᓗ ᐃᓚᒋᔭᐅᕗᑦ ᐱᒻᒪᕆᐅᓂᖅᐹᓂᒃ ᐃᓂᒃᓴᖃᕐᕕᐅᓂᖏᓐᓂ ᓄᓇᕐᔪᐊᕐᒥ ᐅᑭᐅᖅᑕᖅᑐᒥ ᐆᒪᔪᖁᑎᖏᓐᓄᑦ, ᑕᕆᐅᕐᒥᐅᑕᖏᓐᓄᑦ, ᑕᕆᐅᕐᒥᓗ ᓯᑯᒥ ᖃᐅᔨᓴᕐᕕᐅᔪᓐᓇᕐᓂᖅ. ᕿᑭᖅᑕᐃᑦ ᑐᖓᕕᐅᔪᑦ ᓴᓂᑭᓗᐊᕐᒥᐅᓄᑦ ᐃᓚᒋᔭᐅᓪᓚᕆᒍᓐᓇᕐᓂᖅ ᓯᕗᓕᐅᖅᑎᐅᓂᖅ ᐅᑭᐅᖅᑕᖅᑐᒥ ᖃᐅᔨᓴᖅᑕᐅᕙᒃᑐᓂᒃ, ᖃᐅᔨᓴᖅᑎᐅᓗᑎᒃ ᐊᒻᒪᓗ ᑐᕌᖓᓗᑎᒃ ᓄᓇᓕᖏᓐᓄᑦ.

ᐊᕙᑎᒥᓂᒃ ᓴᐳᓐᓂᐊᖅᓯᒪᓗᑎᒃ ᐃᑲᔫᑎᒃᓴᖃᖅᑎᑦᑎᔪᓐᓇᕐᓂᖅ

ᓴᕿᑎᑦᑎᕙᓪᓕᐊᓂᖅ ᓴᐳᓐᓂᐊᖅᑕᐅᓯᒪᓂᐊᖅᑐᓂᒃ ᕿᑭᖅᑕᓂ ᐱᔾᔪᑎᓕᒃ ᐱᓇᓱᐊᕐᓂᖅ ᐊᔾᔨᐅᖏᑦᑐᒥᒃ ᓄᓇᒥᐅᑕᖏᓐᓂᒃ ᕿᑭᖅᑕᐃᑦ ᐊᑐᖅᑕᐅᔪᓐᓇᕐᓂᖏᓐᓂ ᐊᒻᒪᓗ ᓴᕿᑎᑦᑎᓯᒪᓗᑎᒃ ᐱᑕᖃᐃᓐᓇᕈᓐᓇᕐᓂᐊᖅᑐᓂᒃ ᐊᑯᓂᐅᓂᐊᖅᑐᒧᑦ ᐊᖑᓇᓱᒃᑕᐅᖃᑕᕈᓐᓇᕐᓂᐊᖅᑐᓂᒃ ᐊᒻᒪᓗ ᐊᕙᑎᓕᕆᓂᕐᒥᒃ, ᐊᕙᑎᒥᐅᓕᕆᓂᕐᒧᓪᓗ, ᐃᓚᖃᕐᓗᑎᒃ ᓇᐅᑦᑎᖅᑐᐃᔨᖏᓐᓂᒃ, ᓄᓇᓕᖕᓄᓪᓗ−ᐊᐅᓚᑕᐅᔪᓂᒃ ᖃᐅᔨᓴᖅᑎᓂᒃ, ᐊᐅᓪᓛᕈᔾᔨᖃᑕᕈᓐᓇᕐᓂᖅ/ᐊᕙᑎᒧᑦ ᐳᓚᕋᑦᑐᓕᕆᓂᕐᒧᑦ, ᐊᒻᒪᓗ ᐃᓕᖅᑯᓯᓕᕆᓂᕐᒧᑦ, ᐃᓕᓐᓂᐊᕈᑎᒃᓴᓂᒡᓗ ᐱᓕᕆᔪᓐᓇᕐᓂᖅ ᐊᒻᒪᓗ ᐊᓯᖏᓐᓂᒃ ᐊᒥᓱᐊᓗᖕᓂᒃ ᓱᓕ!