ᐃᓕᑕᕆᔭᐅᓗᓂ ᒪᑐᐃᖅᑕᐅᕝᕕᒃᓴᓕᒃ ᓄᑖᖅ ᓴᓇᔭᐅᕌᓂᓵᖅᑐᖅ ᕿᑭᖅᑕᐃᑦ ᐃᒡᓗᖁᑎᖓᑦ ᓴᓂᑭᓗᐊᕐᒥ, ᓄᓇᕗᑦ ᑕᒫᓂ ᓄᕕᐱᕆ 2023-ᒥ!
ᕿᑭᖅᑕᐃᑦ ᐃᒡᓗᖁᑎᖓᑦ ᐃᑲᔪᖅᑎᐅᖕᒪᑕ ᓴᕿᑎᑦᑎᕙᓪᓕᐊᓂᕐᒥᒃ ᑕᕆᐅᖏᓂᒃ, ᓄᓇᖁᑎᖏᓐᓂᓗ ᓴᐳᓐᓂᐊᖅᑕᐅᓯᒪᕝᕕᒃᓴᖏᓐᓂᒃ, ᐱᒻᒪᕆᐅᔪᓂᒃ ᐱᕚᓪᓕᕈᑕᐅᔪᓂᒃ ᒪᑯᓇᖓ: 1. ᓴᓗᒪᔪᓂᒃ ᐳᔪᕐᓗᓕᐅᓐᖏᑐᓂᒃ ᐆᒻᒪᖁᑎᖃᖅᑎᑦᑎᕙᓪᓕᐊᓂᖅ ᐃᒡᓗᖁᑎᖓ ᑕᐃᒪᐃᓕᖓᓗᓂ ᓴᓇᔭᐅᓯᒪᔪᖅ ᓯᕗᓪᓕᐅᔪᖅ ᐅᑭᐅᖅᑕᖅᑐᒥ; 2. ᐊᖀᖃᑎᒌᒐᓱᐊᕈᓐᓇᕐᓂᕐᒥᒃ ᐱᓇᓱᐊᕐᓂᕐᒧᑦ ᓄᓇᓖᓪᓗ ᐊᔪᕈᓐᓃᖅᓴᖅᑕᐅᕙᓪᓕᐊᓂᖏᓐᓄᑦ; ᐊᒻᒪᓗ 3. ᐃᓄᖕᓂᒃ−ᐊᐅᓚᑕᐅᔪᓂᒃ ᐸᖅᑭᔨᖃᕐᓗᑎᒃ ᓇᐅᑦᑎᖅᑐᐃᔨᓂᒃ ᑐᕌᖓᔪᓂᒃ ᐊᔾᔨᒌᖏᑦᑑᑎᐅᔪᓂᒃ ᐆᒪᔪᓂᒃ ᓴᐳᓐᓂᐊᕐᓂᖅ ᐊᒻᒪᓗ ᐱᔭᕇᖅᑕᐅᔪᓐᓇᖅᑐᓂᒃ ᐱᑕᖃᐃᓐᓇᖁᔨᓂᕐᒧᑦ ᐱᕙᓪᓕᐊᓗᑎᒃ ᑐᕌᒐᕆᔭᖏᓐᓂ.
ᑮᓇᐅᔭᒃᓴᓂᒃᑕᐅᓯᒪᔪᑦ ᐊᕙᑎᓕᕆᔨᕐᔪᐊᒃᑯᓐᓄᑦ ᑲᓇᑕᒥ ᐱᐅᓯᑐᖃᓕᕆᔨᒃᑯᑦ ᑮᓇᐅᔭᒃᓴᓂᕝᕕᖓᓐᓂᒃ ᐃᑲᔪᖅᓱᖅᑕᐅᓪᓗᑎᒃ ᐅᑭᐅᖅᑕᖅᑐᒥ ᐱᕚᓪᓕᕈᑎᒃᓴᓕᕆᔨᓄᑦ CANNOR−ᑯᓐᓄᑦ ᐊᒻᒪᓗ ᓴᓗᒪᓂᖅᓴᓂᒃ ᐅᒻᒪᖁᑎᓕᐅᖅᐸᓪᓕᐊᓂᕐᒧᑦ ᐃᑲᔪᖅᑎᓂᒃ Northern REACHE-ᑯᓐᓂᒃ, ᐱᓕᕆᕝᕕᖓᓂ ᐃᑲᔪᖅᓱᐃᕗᑦ ᓄᓇᓕᓐᓂ ᑕᐅᑐᒐᕆᔭᐅᔪᓂᒃ ᓴᐳᓐᓂᐊᖅᑕᐅᓗᑎᒃ ᐊᔪᖅᓴᕈᓃᕈᑎᖃᕈᓐᓇᕐᓂᖏᑦ, ᐊᔪᕈᓐᓃᖅᓴᖅᑕᐅᔪᓐᓇᕐᓂᖏᑦ, ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᖃᐅᔨᕙᓪᓕᐊᓗᑎᒃ.
ᕿᑭᖅᑕᐃᑦ ᐃᒡᓗᖁᑎᖓᓂ ᑐᖓᓴᐃᕝᕕᖓᓂ ᑕᑯᔭᒃᓴᐅᕗᑦ ᐊᔾᔨᐅᖏᑦᑐᓂᒃ ᐃᓄᐃᑦ ᑕᐅᕙᓂ ᐃᓕᖅᑯᓯᖏᓐᓂᒃ, ᐱᐅᓯᑐᖃᒃᑯᓪᓗ ᖃᓄᐃᓕᖓᓂᖏᓐᓂᒃ ᐊᒪᓗ ᐃᓱᒪᒋᔭᐅᓂᖏᓐᓂᒃ ᑕᐅᑐᒐᕆᔭᐅᔪᓂᒃ ᐸᕿᔨᖃᕐᓂᖏᓐᓂᒃ ᓇᐅᑦᑎᖅᑐᐃᔨᓂᒃ ᑕᐅᕙᓂ ᐊᕕᒃᑐᖅᓯᒪᓂᖓᓂ ᐱᑕᖃᐃᓐᓇᖁᓪᓗᒋᑦ ᐃᓅᔪᒫᖅᑐᓄᑦ ᓯᕗᓂᒃᓴᒥ.
ᕿᑭᖅᑕᐃᑦ ᐃᒡᓗᖁᑎᖓ ᓴᓇᔭᐅᓯᒪᕗᖅ ᐃᓂᓪᓚᖓᐃᕕᐅᓂᖅ ᖃᐅᔨᕝᕕᐅᖃᑦᑕᕈᓐᓇᕐᓂᕐᒧᑦ ᑐᕌᖓᔪᓂᒃ ᐊᔾᔨᒌᖏᑦᑑᑎᐅᔪᓂᒃ, ᐊᒻᒪᓗ ᓄᑖᑦᑎᐊᕐᒥᒃ ᑐᓴᐅᑎᖃᑦᑎᐊᖅᑐᓂᒃ ᑲᑎᒪᕕᖃᖅᓱᓂ.
ᐃᒡᓗᖁᑎᖓᑦ ᐅᒻᒪᖁᓯᐅᕈᑎᓕᒃ ᐊᑐᑎᖃᑦᑎᐊᕐᓂᖅᐹᖑᔪᒥᒃ ᐊᕙᑎᒥᒃ ᓴᓇᔭᐅᓂᖏᓐᓂ ᑕᒪᐃᓂ ᐅᑭᐅᖅᑕᖅᑐᒥ, ᓯᕗᓪᓕᐅᖕᒪᑦ ᐳᔪᕐᓗᓕᐅᖏᑐᐃᓐᓇᕐᒥᒃ ᐆᒻᒪᖁᑎᖃᕐᓂᖓ ᓄᓇᕗᒻᒥ, ᑕᐃᓐᓇ ᓴᓂᑭᓗᐊᕐᒥ ᐊᓄᕆᑐᖅᑐᖅ ᐊᑐᓕᖅᑎᑕᐅᓕᕈᓂ. ᐅᒻᒪᖁᑎᑐᕐᓂᖏᑦ ᐃᒡᓗᖁᑎᖓᓂ ᐃᓚᖃᕐᒪᑦ ᓴᓇᔭᐅᓯᒪᔪᓂᒃ ᐃᓗᐹᕈᑎᖃᖅᑐᓂᒃ ᓵᑐᔮᓂᒃ, ᓯᕿᓐᓂᕐᒥᒃ ᖃᐅᒪᖅᑐᖅᑐᒥᒃ ᐃᒡᓘᑉ ᖁᓛᓂᒃ, ᐊᓂᕐᓂᓕᐅᕈᑎᓕᖕᒥᒃ, ᐆᓇᖅᑐᓂᒃ ᐃᒪᕐᒥᒃ ᐅᖂᓴᐅᑎᖃᖅᑐᒥᒃ, ᐅᖁᒃᓴᐅᑎᖃᖅᓱᓂᓗ ᐳᓪᓚᓂᒃ, ᐸᑐᓖᓂᒃ ᑐᖁᖅᓯᓯᒪᔪᑦ, ᐊᓯᖏᓐᓂᓗ ᐊᒥᓱᓂᒃ ᐃᓚᖃᖅᑐᓂᒃ.
ᒥᑎᐅᑉ ᖁᓂᕈᖏᑦ, ᐅᖅᑯᕐᓂᖅᐹᑦᑎᐊᓐ ᖁᓂᕉᕆᔭᐅᕙᒃᑐᓂᒃ ᓄᓇᕐᔪᐊᓕᒫᓂ, ᕿᑎᐊᓃᓪᓚᕆᖕᒪᑕ ᑕᑯᔭᒐᖃᕐᕕᖓᓐᓂ ᐊᔾᔨᐅᖏᑦᑐᒥᒡᓗ ᐃᓕᖅᑯᓯᑐᖃᖏᓐᓄᑦ ᐊᑕᖕᒪᑕ ᓴᓇᔭᐅᓯᒪᕙᖕᓂᖏᓂ ᓴᓂᑭᓗᐊᕐᒥᐅᓄᑦ ᑕᒪᑯᐊ. ᑕᑯᔭᒃᓴᓕᐊᕆᔭᐅᓯᒪᓪᓗᑎᒃ ᑕᐃᑲᓂ ᑕᐃᔭᐅᔪᒥ ᐃᓄᐃᑦ ᐊᑐᖅᐸᒃᑐᑦ ᖁᓂᕈᕐᒥᒃ. ᑕᑯᔭᒐᖏᓐᓂ ᑕᑯᓂᐊᖅᑐᑦ ᐱᐅᓯᑐᖃᕐᒥᒍᑦ ᒥᑎᕐᓂᒃ ᐊᓐᓄᕌᒃᓴᓂᒃᑕᐅᓯᕙᖕᓂᖏᓐᓂᒃ, ᐅᓪᓗᒥᐅᓕᖅᑐᓪᓗ ᒥᑎᐅᑉ ᖁᓂᕈᖏᑦ ᐊᑐᖅᑕᐅᕙᓕᕐᓂᖏᓐᓂᒃ ᐊᒻᒪᓗ ᓴᓇᔭᐅᕙᖕᓂᖏᓐᓂᒃ, ᐅᓂᒃᑳᖅᑕᐅᓗᑎᒡᓗ ᑐᑭᓯᓇᖅᑐᓂᒃ ᐅᖃᓕᒫᒐᕐᓂᒃ ᐊᕙᑎᖏᓐᓂ ᐸᕿᔨᖃᕐᓂᖏᓐᓂᒃ ᓇᐅᑦᑎᑐᖅᑐᐃᔨᓂᒃ ᕿᑭᖅᑕᒐᓴᖁᑎᖏᓐᓂᒃ.
ᓴᓇᔭᐅᓂᖓ ᐃᒡᓗᕐᔪᐊᑦ ᑐᕌᖓᕗᖅ ᐃᓂᒃᓴᐅᓂᕐᒧᑦ ᑕᒪᐃᓐᓄᑦ−ᓄᓇᓕᖕᓄᑦ ᐱᓕᕆᖃᑎᒌᒡᕕᒃᓴᐅᓂᕐᒧᑦ, ᐃᓂᒃᓴᖃᕐᒪᑕ ᑲᑎᒪᖃᑕᕈᓐᓇᕐᓂᖅ ᖃᐅᔨᑎᑦᑎᓗᑎᒃ ᖃᐅᔨᕙᓪᓕᐊᓂᖏᓐᓂᒃ, ᐱᓕᕆᖃᑎᒋᒡᓗᑎᒃ ᐃᑲᔫᕐᓂᐊᖅᑐᓂᒃ ᐊᕕᒃᑐᖅᓯᒪᓂᖏᓐᓂ.
ᖃᐅᔨᓴᕐᕕᖓᓂᒃ ᐃᓂᒃᓴᖃᖅᑐᑦ ᖃᐅᔨᓴᖅᑎᐅᓂᕐᒥᒃ ᐃᖃᓇᐃᔮᓕᖕᓄᑦ ᑕᐅᕙᓂ ᓄᓇᖓᓂ ᐃᓚᒋᔭᐅᕙᒃᑐᑦ ᐱᖃᑕᐅᕙᒃᓱᑎᒃ ᑕᒪᒃᑯᓂᖓ ᐱᓕᕆᖃᑕᐅᓂᖏᓐᓂᒃ ᑕᕆᐅᕐᒥᒃ, ᓄᓇᒥᓗ ᐊᕙᑎᓕᕆᓂᕐᒥᒃ, ᐊᕙᑎᒥᐅᑕᓕᕆᓂᕐᒥᒡᓗ ᓇᐅᑦᑎᖅᑕᐅᓂᖏᓐᓂᒃ. ᖃᐅᔨᓴᒐᒃᓴᓂᒃᑕᐅᔪᑦ ᐸᐸᑕᐅᔪᓐᓇᖅᑐᑦ ᑕᐅᕙᓂ ᑐᖁᖅᑕᐅᓯᒪᕝᕕᖓᓂ, ᑲᒪᒋᔭᐅᓗᑎᒡᓗ ᐃᑲᔫᑕᐅᓂᕐᒧᑦ ᑲᔪᓯᔪᓂᒃ ᓄᓇᓕᖕᓄᑦ−ᐊᐅᓚᑕᐅᔪᓂᒃ ᖃᐅᔨᓴᖅᑕᐅᕙᓪᓕᐊᔪᓂᒃ ᑕᒪᒃᑯᓂᖓ ᐊᒃᑐᖅᑕᐅᓴᕋᐃᓐᓂᖏᓐᓂᒃ ᐃᒪᖁᑎᖏᑦ, ᐃᓚᒃᓴᔭᒃᓴᓂᒃᑕᐅᓯᒪᕙᒃᑐᓂᒃ ᐊᒻᒪᓗ ᐆᒪᔪᕐᓂᖔᖅᑐᓂᒃ ᖃᐅᔨᓴᖅᑕᐅᖁᔭᐅᔪᓂᒃ. ᓄᓇᓖᑦ ᐃᓄᖁᑎᖏᑦ ᒪᒃᑯᒃᑐᓪᓗ ᐊᔪᕈᓐᓃᖅᓴᖅᑕᐅᓕᖅᑐᑦ ᖃᐅᔨᓴᖅᐸᓐᓂᕐᒥᒃ ᓱᕐᓗ ᑕᒪᑯᓂᖓ ᖃᐅᔨᓴᖅᑕᐅᕙᓐᓂᖏᓐᓂ ᐆᒪᔪᐃᑦ ᖃᓄᐃᖏᓂᖏᑦ ᐊᒻᒪᓗ ᓂᕿᒃᓴᖃᑦᑎᐊᕈᓐᓇᕐᓂᖏᑦ.
ᖁᓛᓂ ᐱᖓᓱᓂᒃ ᐃᒡᓗᕈᓰᑦ ᐊᑐᖅᑕᐅᕙᒃᐳᑦ ᐊᑯᓂᐅᓂᖅᓴᖅ ᑕᐃᑲᓃᓐᓂᐊᖅᑐᓄᑦ ᐃᓚᒋᔭᐅᕙᒃᑐᑦ ᐃᖃᓇᐃᔮᒃᓴᓂᒃ ᐱᓕᕆᔨᐅᔪᑦ ᓴᕿᑎᑦᑎᕙᓪᓕᐊᓂᐊᖅᑐᓂᒃ ᐊᒻᒪᓗ ᐊᔪᕈᓐᓃᖅᓴᐃᓂᖏᓐᓂᒃ ᐃᑲᔪᖅᓱᐃᔪᓂᒃ ᓄᓇᓕᖕᓄᑦ−ᐊᐅᓚᑕᐅᔪᓂᒃ ᓴᐳᓐᓂᐊᖅᑕᐅᓯᓐᓈᖅᑐᓂᒃ ᐊᔪᖅᓴᕈᓃᕈᑎᒃᓴᓕᕆᔪᓂᒃ.
ᐃᓚᖓᑦ ᐃᒡᓗᕈᓯᖅ ᖁᓛᓃᑦᑐᖅ ᐊᑐᖅᑕᐅᖔᕈᓐᓇᕐᒥᔪᖅ ᐱᓕᕆᕕᒃᓴᐅᓂᕐᒧᑦ ᑎᑭᓯᒪᔪᓄᑦ ᐱᓕᕆᐊᕆᔭᖏᓐᓄᑦ. ᓴᓇᓯᒪᓂᖓ ᐃᒡᓗᖁᑎᖓᑕ ᐋᕿᒋᐊᖅᑕᐅᖃᑕᕈᓐᓇᕐᒪᑦ ᐊᑐᖅᑕᐅᓗᓂ ᐊᓯᖏᓐᓂᒃ ᐊᔾᔨᒌᖏᑦᑑᑎᐅᔪᓂᒃ ᐱᓕᕆᐊᖑᕙᓪᓕᐊᔪᓂᒃ, ᐱᕕᒃᓴᖃᕆᐊᖃᕐᓂᖏᓄᓪᓗ ᓄᓇᓖᑦ.
ᓇᑎᐊᓂ ᐃᓯᕐᕕᖓᓂ ᐅᐸᒃᑕᐅᒐᔪᖕᓂᖅ ᐃᓚᖃᕆᕗᖅ ᐃᖃᓇᐃᔭᕐᕕᖕᓂᒃ ᐱᓕᕆᖃᑎᒌᒡᕕᐅᔪᓐᓇᖅᑐᓂᒃ ᓄᓇᓕᖕᓂ ᑎᒥᖁᑎᒋᔭᐅᔪᓄᑦ ᐅᑯᓂᖓ ᓲᕐᓗ ᓴᓂᑭᓗᐊᕐᒥ ᐊᖑᓇᓱᒃᑏᑦ ᑲᑐᔾᔨᖃᑎᒌᖏᓐᓄᑦ, ᐅᑭᐅᖅᑕᖅᑐᒥ ᒥᑎᓕᒻᒥᐅᑦ ᑎᒥᖁᑎᖏᓐᓄᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ, ᐃᖃᓗᓕᕆᔨᖏᓐᓄᑦ, ᐊᓯᖏᓐᓄᓗ ᐱᓕᕆᐊᓂᒃ ᐱᔾᔪᑎᖃᖅᑐᓂᒃ ᐊᕙᑎᓕᕆᓂᕐᒥᒃ ᓇᐅᑦᑎᑐᐃᓂᕐᒥᒃ ᐊᕕᒃᑐᖅᓯᒪᓂᖓᓂ.
ᒥᑭᔪᒥᒃ ᓄᓇᓕᖕᓄᑦ ᑐᑭᓯᓂᐊᕐᕕᖃᖅᑐᑦ ᐅᖃᓕᒫᒐᖃᕐᕕᖕᒥ ᑕᐅᕙᓂ ᑐᖓᓴᐃᕝᕕᖓᓂ/ᑕᑯᔭᒐᖃᕐᕕᖓᓂ ᐊᑐᖅᑕᐅᕙᒃᑐᒥᒃ ᐅᓂᒃᑲᓕᐊᓄᑦ, ᐱᓕᕆᐊᕆᔭᐅᔪᑦ ᓴᕿᑎᑕᐅᓂᖏᓐᓄᑦ ᐊᒻᒪᓗ ᖃᐅᔨᒪᔭᐅᔭᕆᐊᖃᖅᑐᓂᒃ ᖃᐅᔨᕝᕕᐅᔪᓐᓇᕐᓂᕐᒧᑦ.