ᕿᑭᖅᑕᐃᑦ ᐱᓕᕆᐊᖑᓂᖏᑦ
ᐱᓕᕆᐊᕆᔭᐅᔪᑦ ᑲᔪᓯᕙᓪᓕᐊᖏᓐᓇᖅᑐᑦ ᐃᑲᔪᖅᓱᐃᓂᕐᒧᑦ ᓴᐳᓐᓂᐊᖅᑕᐅᓯᒪᓂᖏᓐᓂᒃ ᐊᕙᑎᖏᑦ ᐃᑲᔫᑎᒃᓴᐅᔪᓐᓇᖅᑐᓂᒃ ᓴᕿᑎᑦᑎᕙᓕᐊᓗᑎᒃ ᕿᑭᖅᑕᐃᑦ ᓄᓇᓕᖕᓄᑦ−ᐊᐅᓚᑕᐅᔪᓂᒃ ᑕᕆᐅᕐᒥ ᓄᓇᒥᓗ ᓴᐳᓐᓂᐊᖅᑕᐅᕕᒃᓴᖏᓐᓂᒃ ᓴᓂᑭᓗᐊᑉ ᕿᑭᖅᑕᒐᓴᖏᓐᓂᒃ. ᑕᒪᒃᑯᐊ ᐊᔾᔨᒌᖏᑦᑑᑎᐅᔪᑦ ᐱᓕᕆᐊᖑᓂᖏᑦ ᐊᖅᑯᑎᓪᓚᕆᐅᕗᑦ ᑲᔪᓯᑎᐊᕈᓐᓇᕐᓂᕐᒧᑦ. ᐊᑐᓂ ᐃᖕᒥᒍᑦ ᐱᓕᕆᐊᕆᔭᐅᒐᓗᐊᖅᓱᑎᒃ ᐃᑲᔪᖃᑦᑕᐅᑎᕙᖕᒪᑕ ᐊᓯᖏᓐᓂᒃ ᐊᒻᒪᓗ ᓄᓇᓖᑦ−ᑕᒪᐃᓐᓂᒃ ᐃᓚᒋᔭᐅᕙᒃᓱᑎᒃ. ᑖᒃᑯᐊ ᐱᓕᕆᐊᖃᖅᐳᑦ ᒪᑯᓂᖓ ᐊᔾᔨᒌᖏᑦᑑᑎᓂᒃ; ᑕᕆᐅᕐᒥ ᓯᑯᒥᒃ, ᑕᕆᐅᕐᒥᒃ ᐃᒪᕐᒥᓕᕆᓂᕐᒥᒃ, ᐊᒻᒪᓗ ᐆᒪᔪᓕᕆᓂᕐᒧᑦ ᓇᐅᑦᑎᖅᑐᐃᓂᕐᒥᒃ, ᖃᐅᔨᒋᐊᖅᑕᐅᖃᑕᐃᓐᓇᕐᓂᖏᓐᓂᓗ ᐊᒻᒪᓗ ᒪᑯᓂᖓ ᐱᓕᕆᕙᒃᓱᑎᒃ, ᖃᒧᓯᐅᕈᓐᓇᕐᓂᕐᒥᒃ ᐊᑐᒐᒃᓴᓕᐅᖅᓯᒪᓂᖅ, ᐱᖁᑎᓂᒃ ᓱᕋᖅᓯᒪᔪᓂᒃ ᓴᓇᔪᓐᓇᕐᓂᖅ, ᓴᓇᖑᐊᒐᒃᓴᓂᒃ ᐅᒃᑯᓯᒃᓴᔭᕐᓂᒃ ᐅᔭᕋᓐᓂᐊᖃᑦᑕᕐᓂᖅ, ᒪᒃᑯᒃᑐᓂᒃ ᐊᖑᓇᓱᒋᐅᖅᓴᑎᑦᑎᕙᖕᓂᖅ ᐊᒻᒪᓗ ᒥᑎᐅᑉ ᖁᓂᕈᑎᖏᓐᓂᒃ ᒥᖅᓱᕆᐅᖅᓴᕙᖕᓂᕐᖏᓐᓂᒃ ᐊᒻᒪᓗ ᐊᑎᒋᓕᐅᕈᔾᔨᖃᑕᕐᓂᖏᓐᓂᒃ ᒪᒃᑯᒃᑐᓂᒃ, ᐊᕐᕌᒍᒥ ᑕᒪᒃᑯᐊ ᓈᒻᒪᒃᓯᔭᕌᖓᑦ ᐱᕕᓕᕆᐊᕆᔭᐅᕙᒃᓱᑎᒃ.
ᐱᓪᓗᐊᑕᐅᓂᖏᑦ ᓇᐅᑦᑎᖅᑐᐃᔩᑦ ᓯᕗᓪᓕᕐᒥ ᐱᓕᕆᐊᕆᔭᖏᑦ
ᕿᑎᐊᓃᓚᕆᖕᒪᑕ ᕿᑭᖅᑕᐃᑦ ᐱᓕᕆᐊᖑᓂᖏᓐᓂ, ᐊᑯᓂᐊᓗᒃ ᐊᖑᓇᓱᒃᑎᒻᒪᕆᐅᔫᒃ ᓯᒥᐅᓂ ᑲᕕᒃ ᐊᒻᒪᓗ ᔪᐊᓇᓯ ᐃᑉᐸᒃ ᓯᓚᑐᓂᕐᒥᒃ ᖃᐅᔨᒪᔪᐊᓘᓂᖏᓐᓄᑦ ᐃᑲᔪᖅᑎᐅᕙᒃᐳᑦ ᓇᐅᑦᑎᑐᐃᔨᖏᓐᓂᒃ, ᐊᔪᕈᓐᓃᖅᓴᐃᕙᒃᓱᑎᒃ ᐃᓕᓐᓂᐊᖅᑐᓕᕆᓂᒃᑯᑦ ᐊᒻᒪᓗ ᑲᒪᑦᑎᐊᔪᓴᐃᓐᓇᖁᔨᓂᕐᒥᒃ. ᐱᒻᒪᕆᐅᔪᓂᒃ ᐃᓚᒋᔭᐅᕗᑦ ᖃᐅᔨᒪᔭᐅᔪᓂᒃ ᖃᐅᔨᑎᑦᑎᕙᓪᓕᐊᔪᓐᓇᕐᓂᖅ ᓄᓇᓕᖕᓄᑦ ᐱᑕᖃᕆᐊᖃᒻᒪᕆᒃᑐᓂᒃ ᐱᓕᕆᐊᖑᕙᓪᓕᐊᔪᑦ ᑎᑭᑕᐅᕙᓪᓕᐊᔪᓐᓇᕐᓂᖏᓐᓄᑦ ᐊᒻᒪᓗ ᐃᓚᐅᑎᑕᐅᔭᕆᐊᖃᕐᓂᖏᓐᓄᑦ ᒪᒃᑯᒃᑐᖁᑎᖏᑦ.
ᒥᑏᑦ ᖁᓂᕈᖏᓐᓂᒃ ᒥᖅᓱᕆᐅᖅᓴᑎᑦᑎᕙᓐᓂᖅ
ᒥᑎᕐᓂᒃ ᖁᓂᕈᖏᑦ, ᓄᓇᕐᔪᐊᓕᒫᒥ ᐅᖅᑯᕐᓂᖅᐹᖑᕗᑦ ᖁᓂᕈᕆᔭᐅᕙᒃᑐᓂ ᐊᓯᓕᒫᖏᓐᓂ, ᐱᒻᒪᕆᐊᓘᕗᑦ ᐃᓕᖅᓯᑐᖃᕆᔭᐅᔪᓄᑦ ᑕᒪᒃᑯᐊ ᐊᒻᒪᓗ ᐊᔾᔨᐅᖏᓐᓂᖏᓐᓄᑦ ᐃᓕᖁᓯᖃᕈᑕᐅᓂᕐᒧᑦ ᓴᓂᑭᓗᐊᕐᒥᐅᓄᑦ. ᖁᓂᕈᓕᖕᓂᒃ ᐊᒻᒪᓗ ᒥᖅᓱᕆᐅᖅᓴᓂᕐᒥᒃ ᑲᔪᓯᑎᑕᐅᕙᓐᓂᖏᑦ ᐃᑲᔫᑕᐅᕙᖕᒪᑕ ᐱᕙᓪᓕᐊᑎᑦᑎᔪᓐᓇᕐᓂᕐᒧᑦ ᐱᑕᖃᐃᓐᓇᕈᓐᓇᖅᑐᓂᒃ ᒥᑎᕐᓂᒃ ᖁᓂᕈᖏᓂᒃ ᐊᑐᕐᓗᑎᒃ ᐊᔪᖅᓴᕈᓃᖅᐹᓪᓕᕈᑕᐅᔪᓐᓇᕐᓂᕐᒧᑦ ᓴᓂᑭᓗᐊᕐᒥ, ᐊᒻᒪᓗ ᐊᑎᒋᓕᐅᕈᑕᐅᕙᖕᓂᖏᓐᓂ ᒪᒃᑯᒃᑐᓄᑦ ᑐᕌᖓᔪᓂᒃ, ᒥᖅᓱᕆᐅᖅᓴᑎᑕᐅᕙᒃᑐᓄᑦ ᒪᒃᑯᒃᑐᓄᑦ ᐅᖅᑯᖅᑐᓂᒃ, ᑕᒪᒃᑯᐊ ᐊᔪᕈᑕᐅᕙᖕᓂᖏᓐᓄᑦ ᐃᓚᐅᔪᓐᓇᖃᑦᑕᕐᓂᖅ ᒪᒃᑯᒃᑐᑦ ᓇᐅᑎᖅᑐᐃᔩᑦ ᐱᓕᕆᐊᕆᕙᓪᓕᐊᔭᖏᓂ. ᐃᓱᒪᒋᓪᓗᒋᑦ ᓴᓂᑭᓗᐊᕐᒥᐅᓄᑦ ᐱᒻᒪᕆᐅᓂᖏᑦ ᒥᑏᑦ, ᐊᑑᑎᓕᒻᒪᕆᐊᓘᕗᑦ ᑲᒪᒋᔭᐅᕙᖕᓂᖏᑦ ᕿᑭᖅᑕᓂ, ᐊᒻᒪᓗ ᐱᑕᖃᐃᓐᓇᕈᓐᓇᕐᓂᖏᓐᓂᒃ ᑐᖓᕕᖃᖅᓱᑎᒃ ᑲᒪᑦᑎᐊᔪᓴᒍᑕᐅᖏᓐᓇᕐᓂᖅ ᒥᑎᕐᓂᒃ ᐊᒻᒪᓗ ᒥᑎᑦ ᖁᓂᕈᖏᓐᓂᒃ ᑕᐃᑰᓇ ᕿᑭᖅᑕᐃᑦ ᐱᓕᕆᐊᕆᕙᒃᑕᖏᓐᓂ ᐃᑲᔪᖅᓱᖅᑕᐅᕙᒃᑐᑦ ᓄᓇᓕᖕᓂ ᑕᐅᑐᒐᕆᔭᐅᔪᓂᒃ ᒪᓕᒍᑕᐅᓗᑎᒃ ᑲᒪᑦᑎᐊᔪᓴᐃᓐᓇᒋᐊᖃᕐᓂᖏᓐᓂᒃ ᑕᒪᒃᑯᓂᖓ.
ᒥᑎᕐᓂᒃ ᖁᓂᕈᖏᓐᓂᒃ ᒥᖅᓱᕆᐅᖅᓴᑎᑕᐅᕙᖕᓂᖏᑦ ᑕᕐᕆᔭᐅᓯᐅᖅᑕᐅᓪᓗᑎᒃ ᑕᐃᒃᑯᓄᖓ ᐅᕙᒍᑦ ᑕᓚᕖᒃᓴᖁᑎᖓᒍᑦ.
ᒪᒃᑯᒃᑐᓂᒃ ᐊᖑᓇᓱᒋᐅᖅᓴᑎᑦᑕᐅᓂᖏᓐᓄᑦ ᐱᓕᕆᐊᑦ
ᐊᔪᕈᓐᓃᖅᓴᐃᕙᓪᓕᐊᓂᖏᑦ ᖃᐅᔨᑎᑦᑎᕙᓪᓗᐊᑎᒃ ᖃᐅᔨᒪᔭᐅᔪᑐᖃᕐᓂᒃ ᐊᖑᓇᓱᒃᑎᓄᑦ ᐃᓐᓇᑐᖃᕐᓄᓪᓗ ᒪᒃᑯᒃᑐᑦ ᐱᒻᒪᕆᐅᔪᒥᒃ ᓯᕗᓪᓕᐅᑎᑕᐅᒋᕗᑦ. ᓯᒥᐅᓂᒃᑯᑦ ᐊᒻᒪᓗ ᔪᐊᓇᓯ ᐃᓚᒋᔭᐅᕘᒃ ᐊᖑᓇᓱᒃᑎᐅᖏᓐᓇᕐᓂᖏᓐᓄᑦ ᐊᑯᓂᐊᓗᒃ ᐊᒻᒪᓗ ᖃᐅᔨᒪᔨᒻᒪᕆᐅᓂᖏᓐᓄᑦ ᐊᖑᓇᓱᖕᓂᕐᒥᒃ ᑕᐃᒫᒃ ᐅᑭᐅᖃᖃᑎᒋᔭᖏᓐᓂ ᓄᓇᒥᓂ, ᐱᓗᐊᖅᑐᒥᒃ ᐅᑭᐅᒃᑯᑦ ᐊᐅᓪᓛᕈᓐᓇᕐᓂᕐᒥᒃ ᐊᒻᒪᓗ ᐊᑕᕐᓇᖅᑐᓕᕆᔪᓐᓇᕐᓂᕐᒥᒃ ᖃᓂᒋᔭᖏᓐᓂ ᐊᐅᒃᑲᕐᓂᖓᔪᑦ ᐃᑭᕋᓴᐃᑦ , ᐊᒻᒪᓗ ᓯᓇᓃᖃᑕᐅᕙᖕᓂᖏᓐᓂ. ᐃᑲᔪᖅᑕᐅᕙᖕᓂᖏᑦ ᑕᒪᒃᑯᓄᖓ ᐊᔪᕈᓐᓃᖅᓴᕈᑕᐅᕙᒃᐳᑦ ᒪᒃᑯᒃᑐᓄᑦ ᐊᒻᒪᓗ ᖃᐅᔨᒪᓕᕈᓐᓇᕐᓂᖅ ᑕᕆᐅᕐᒥ ᓯᑯᒥᒃ ᖃᐅᔨᒪᔭᐅᔭᕆᐊᓕᖕᓂᒃ, ᐊᒻᒪᓗ ᐊᖑᓇᓱᒍᓐᓇᕐᓂᕐᒥᒃ ᑕᒪᒃᑯᐊ ᐱᒻᒪᕆᐊᓘᓂᖏᓐᓄᑦ. ᒪᒃᑯᒃᑐᑦ ᐊᖑᓇᓱᖕᓂᕐᒥᒃ ᐃᓕᓐᓂᐊᖅᑎᑕᐅᕙᓂᖏᑦ ᒪᑐᐃᖓᑎᑕᐅᕙᒃᑐᑦ ᓄᓇᓕᖕᓄᑦ ᑕᒪᐃᓐᓄᑦ, ᐊᒥᓱᒐᓴᓂᒃ ᑐᓴᒐᒃᓴᓕᐅᖅᐸᒃᓱᑎᒃ ᐊᑎᓕᐅᕈᓐᓇᖅᓯᔪᓂᒃ ᐃᓚᐅᔪᒪᔪᓂᒃ ᐊᕐᕌᒍᑕᒫᖅ, ᐊᒻᒪᓗ ᐱᕕᒃᓴᖃᖅᑎᑕᐅᕙᒃᓱᑎᒃ ᒪᒃᑯᒃᑐᑦ ᖃᒧᓯᐅᖃᑕᐅᔪᓐᓇᕐᓂᖏᓐᓂ, ᓴᓈᓂᓵᖅᑕᖏᓐᓂᓗ ᐊᑐᕈᓐᓇᖅᓯᓂᐊᕐᒪᑕ ᓄᓇᒦᖃᑕᐅᓕᕈᑎᒃ.
ᐱᖁᑎᒃᓴᓕᐅᕐᓂᕐᒥᒃ ᐱᓕᕆᐊᖏᑦ
ᐊᔪᕈᓐᓃᖅᓴᖅᑕᐅᕙᖕᓂᖏᑦ ᒪᑯᒃᑐᑦ ᓴᓇᖃᑕᐅᔪᓐᓇᕐᓂᖅ, ᐋᕿᐅᒪᑎᑦᑎᑦᑎᐊᕈᓐᓇᕐᓂᕐᓗ ᐱᖁᑎᓂᒃ ᐊᔪᕈᓃᕐᓗᑎᒃ ᓄᓇᒥ ᐱᓕᕆᖃᑕᐅᔪᓐᓇᕐᓂᕐᒥᒃ ᐱᒻᒪᕆᐊᓘᓪᓗᓂ ᐃᓚᒋᔭᐅᓪᓚᕆᒃᑐᓂᒃ ᑕᒪᒃᑭᕆᐊᖅᓯᒪᔪᓂᒃ ᐱᓕᕆᕙᒃᓱᑎᒃ ᑖᒃᑯᐊ ᓯᒥᐅᓂᒃᑯᑦ ᔪᐊᓇᓯᒃᑯᒃ ᐃᑲᔪᖅᑎᐅᓂᖏᓐᓂ ᖃᓄᐃᓕᐅᓚᖓᓂᖏᓐᓂᒃ ᐃᓚᐅᓂᐊᖅᑐᑦ ᐊᓯᖏᑦ ᐊᖑᓇᓱᒃᑏᑦ ᐊᒻᒪᓗ ᐃᓐᓇᑐᖃᐃᑦ ᓴᓂᑭᓗᐊᕐᒥ. ᓴᕿᑎᑕᐅᕙᒃᑐᑦ ᐃᑲᔫᑕᐅᕙᒃᐳᑦ ᓂᕈᑐᓂᖅᓴᓂᒃ ᓄᓇᓕᖕᓂ ᐱᓕᕆᐊᕆᔭᐅᔪᓐᓇᖅᑐᓄᑦ, ᓲᕐᓗ ᐊᑐᖅᑕᐅᓂᐊᖅᑐᓂᒃ ᓴᓇᔭᐅᕌᓂᓵᖅᑐᓂᒃ ᖃᒧᓯᐊᑦ ᑕᐃᒃᑯᓄᖓ ᐊᖑᓇᓱᒃᑏᑦ ᑲᑐᔾᔨᖃᑎᒌᖏᓐᓂᒃ, ᐃᓚᒋᔭᐅᒪᑕ ᐱᖁᑎᒋᔭᐅᓂᖅ ᐊᖑᓇᓱᒃᑎᖏᓐᓄᑦ, ᐃᑲᔫᑕᐅᓂᕐᒧᑦ ᐱᓕᕆᐊᖑᕙᖕᓂᖏᑦ ᐊᑭᓕᖅᑐᖅᑕᐅᕙᒃᓱᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ.
ᐃᓕᓯᕝᕕᒃᓴᓂᒃ ᐃᕕᕋᓕᐅᕐᓂᖅ
ᐃᓕᓯᕕᒃᓴᓂᒃ ᐃᕕᕋᓕᐅᖃᑦᑕᕐᓂᖅ ᑕᐅᕙᓂᑐᐊᖅ ᓴᓂᑭᓗᐊᕐᒥᐅᓂ ᐊᑯᓂᐊᓗᒃ ᐱᐅᓯᕆᔭᐅᒋᕗᖅ, ᐊᒥᓲᔪᓐᓃᖅᓱᑎᒃ ᐃᓐᓇᑐᖃᐃᑦ ᖃᐅᔨᒪᔪᑦ ᓱᓕ ᖃᓄᖅ ᓴᓇᔭᐅᕙᖕᒪᖔᑕ ᐃᕕᕋᐃᑦ. ᐊᔪᕈᓐᓃᖅᓴᖅᑕᐅᓂᖏᑦ ᒪᒃᑯᒃᑐᑦ ᑕᒪᒃᑯᓂᖓ ᑲᔪᓯᑎᑦᑎᔭᕆᐊᖃᕐᓂᖏᓐᓂᒃ ᓯᕗᓪᓕᐅᔾᔭᐅᒋᕗᑦ ᐱᓕᕆᐊᕆᕙᒃᑕᖏᓐᓂ ᑕᐃᑲᓂ.
ᓴᓇᖑᐊᒐᒃᓴᓕᐅᕈᑎᓂᒃ ᐱᓕᕆᐊᑦ
ᓴᓂᑭᓗᐊᕐᒥ ᐊᒥᓱᒐᓴᖕᓂᒃ ᖃᐅᔨᒪᔭᐅᑦᑎᐊᖅᑐᓂᒃ ᓴᓇᖑᐊᖅᑎᖃᕐᒪᑕ ᐅᒃᑯᓯᒃᓴᔭᕐᓂᒃ ᐃᓚᒋᔭᐅᓪᓗᑎᒃ ᓯᒥᐅᓂᓗ ᔪᐊᓇᓯᓗ, ᐊᒥᓲᖏᓐᓂᖅᓴᐅᓕᕋᓗᐊᖅᑎᓪᓗᒋᑦ ᒪᒃᑯᒃᑐᑦ ᓴᓇᖑᐊᖅᐸᒃᑐᑦ ᐅᓪᓗᒥᐅᓕᖅᑐᖅ. ᐊᔪᕈᓐᓃᖅᓴᖅᑕᐅᓂᖏᑦ ᓴᓇᖑᐊᒐᒃᓴᓂᒃ ᐅᒃᑯᓯᒃᓴᔭᕐᓂᒃ ᐅᔭᕋᖕᓂᐊᖃᑕᕐᓂᖏᑦ ᐱᒻᒪᕆᐊᓗᖕᓂᒃ ᐃᓚᒋᔭᐅᖕᒪᑕ ᐃᓄᐃᑦ ᐃᓕᖅᑯᓯᑐᖃᖏᓐᓂᒃ ᐸᐸᑦᑎᓂᕐᒧᑦ ᐊᒻᒪᓗ ᓄᓇᓕᖕᓂ ᓴᐳᓐᓂᐊᖅᑕᐅᓯᒪᔪᓂᒃ ᐊᔪᖅᓴᖏᓐᓂᖅᓴᐅᓕᕈᑕᐅᔪᓐᓇᖅᑐᓄᑦ.
ᖃᔭᓕᐅᖅᓴᕙᖕᓂᖅ
ᖃᔭᓕᐅᕈᓐᓇᕐᓂᕐᒥᒃ ᐱᓕᕆᐊᖑᕙᒃᑐᑦ ᐊᒥᓱᐊᓗᖕᓄᑦ ᐃᓐᓇᑐᖃᕐᓄᑦ ᒪᒃᑯᒃᑐᓄᓪᓗ ᐱᓕᕆᖃᑎᒌᒍᑕᐅᕙᓗᑎᒃ, ᑕᐃᒪᐃᒐᔪᐃᑦᑐᒻᒪᕆᐅᓕᖅᑎᓪᓗᒋᑦ ᑕᐃᒃᑯᓂᖓᑦᓴᐃᓐᓇᖅ ᐱᓕᕆᖃᑎᒌᒍᓐᓇᕐᓂᖏᓐᓂᒃ. ᑕᒪᒃᑯᐊ ᕿᓰᑦ ᐅᕝᕙᓗᓐᓃᑦ ᐊᐃᕖᑦ ᑲᐅᖏᓐᓂᒃ ᐊᑐᐃᓐᓇᐅᑎᑕᐅᕙᒃᑐᑦ ᒪᒃᑯᒃᑐᓄᑦ ᐊᖑᓇᓱᒋᐊᖅᑎᑕᐅᕙᒃᓱᑎᒃ, ᕿᓯᓕᕆᔭᐅᕙᒃᓱᑎᒃ ᒥᖅᓱᖅᑕᐅᕙᒃᓱᑎᒡᓗ ᒥᖅᓱᖅᑎᓄᑦ ᖃᔭᐅᑉ ᕿᔪᐊᑕ ᖄᖓᒍᑦ. ᐃᓕᐅᖃᖅᑕᐅᔭᕆᐊᓕᖕᓂᒃ. ᐱᔭᕇᖅᑕᐅᒑᖓᒥᒃ ᖃᔭᐃᑦ ᓴᓇᔭᐅᕙᓚᐅᖅᑐᑦ ᐊᑯᓂᐅᓂᐊᖅᑐᒧᑦ ᐋᕿᐅᒪᓂᐊᕐᒪᑕ, ᑕᐃᑲᓂ ᑲᑎᕝᕕᖓᓂ ᓄᑖᒥ ᕿᕿᖅᑕᐃᑦ ᐃᒡᓗᖁᑎᖓᓂ ᑕᑯᔭᒐᐅᑎᑕᐅᓕᖅᓱᑎᒃ ᕿᑎᐊᓂ.
ᓴᓇᕐᕈᑎᒃᓴᖏᑦ ᐱᖁᑎᑦ ᐊᓯᖏᓪᓗ ᐱᖁᑎᕐᔪᐊᑦ
ᐱᖁᑎᕐᔪᐊᑦ ᐊᒻᒪᓗ ᓴᓇᕐᕈᑎᒃᓴᐃᑦ ᐊᑑᑎᖃᕐᓂᖅᐹᖑᕗᑦ ᐱᓕᕆᐊᕆᔭᐅᓂᐊᖅᑐᑦ ᑲᔪᓯᔪᓐᓇᕐᓂᖏᓐᓄᑦ. ᓴᓇᔭᐅᓂᖏᑦ ᐃᒡᓗᕋᓛᑦ ᓄᑖᑦ ᐃᑲᔫᑕᐅᓂᐊᖅᑐᑦ ᓄᓇᓖᑦ ᐊᕙᑎᖏᓐᓂᒃ ᓴᐳᓐᓂᐊᖅᑕᐅᓂᖏᓐᓂᒃ ᐃᑲᔪᕐᓂᖃᕐᓂᐊᖅᑐᓂᒃ, ᑲᒪᑦᑎᐊᔪᓱᐃᓐᓇᒋᐊᖃᕐᓂᖏᓐᓄᓪᓗ, ᐊᒻᒪᓗ ᐊᑕᕐᓇᖅᑐᓕᕆᔪᓐᓇᕐᓂᕐᒧᑦ ᓯᕗᓪᓕᐅᑎᑕᐅᔪᓂ. ᐊᔾᔨᐅᖏᑦᑐᓂᒃ ᓴᓇᔭᐅᖁᔨᓚᐅᖅᑐᑦ ᐆᒪᖁᑎᖃᑦᑎᐊᕐᓂᐊᖅᑐᓂᒃ ᓵᑐᔮᓕᖕᓂᒃ ᐃᓗᐹᕈᑎᓕᖕᓂᒃ ᐃᒡᓗᕋᓛᑦ ᓴᓇᕙᐅᓂᖏᓐᓂ ᖄᖓᓃᓐᓂᐊᖅᑐᓂᒃ ᓯᕿᓂᕐᒥᒃ ᐆᒻᒪᖁᓯᐅᕝᕕᐅᔪᒥᒃ. ᐃᒡᓗᕋᓛᖅ ᐊᑐᕐᓂᐊᕐᒥᔪᖅ ᓄᑕᓂᒃ ᐱᔭᒃᓴᖏᓐᓂᒃ ᓄᓇᓕᖕᓄᑦ ᓯᕗᓪᓕᐅᔾᔭᐅᖁᔭᐅᔪᓂᒃ ᖃᐅᔨᓴᖅᑕᐅᖃᑕᖁᔭᐅᔪᓂᒃ ᐊᒻᒪᓗ ᓄᓇᓕᖕᓄᑦ ᐃᖃᓇᐃᔮᒃᓴᓂᒃ. ᐊᒻᒪᑕᐅᖅ ᐃᑲᔪᖅᓱᖅᑕᐅᓯᒪᖕᒥᔪᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᓄᑖᓂᒃ ᓯᑭᑑᖅᑖᕈᑎᒃᓴᖏᓐᓂᒃ, ᓄᑖᓂᒡᓗ ᐅᒥᐊᖅᑖᕈᓐᓇᕈᑎᒃᓴᖏᓐᓂᒃ, ᑲᔪᓯᔪᓂᐊᕐᒪᑦ ᐱᔭᒃᓴᕆᔭᖏᑦ ᐊᒻᒪᓗ ᑲᒪᑦᑎᐊᔪᓴᐃᒋᐊᕐᑲᕐᓂᖏᓐᓂᒃ ᕿᑭᖅᑕᐃᑦ ᑕᕆᐅᖓᓂ ᐊᒻᒪᓗ ᓄᓇᖏᓐᓂᒃ ᓇᔪᒐᕆᔭᐅᔪᓐᓇᕐᓂᖏᓐᓄᑦ ᓯᕗᓂᒃᓴᓂᒃ ᐃᓅᔪᒫᕐᒥᔪᓄᑦ ᑐᕌᖓᓗᑎᒃ.
ᓄᓇᒥᐅᑕᕆᔭᐅᔪᓂᒃ ᐱᑕᖃᕐᓂᖏᑦ ᖃᐅᔨᒪᔾᔪᑎᒃᓴᖏᓐᓂᒃ
ᑕᒪᐃᓐᓂᒃ−ᓄᓇᓕᑦ ᐃᓚᒋᔭᐅᓂᖏᓐᓂ ᐋᕿᐅᒪᓂᕐᒥᓄᑦ ᐊᑐᖅᑕᐅᒋᕗᑦ ᑕᒪᒃᑭᖅᑐᓂᒃ ᖃᐅᔨᒪᔾᔪᑎᒃᓴᖃᕆᐊᖃᕐᓂᖏᓐᓂ ᑐᕌᖓᓗᑎᒃ ᐊᑯᓂᐅᓂᐊᖅᑐᒧᑦ ᓇᐅᑦᑎᖅᑐᐃᕙᓪᓕᐊᔪᓐᓇᕐᓂᖏᓐᓄᑦ ᐊᒻᒪᓗ ᑲᒪᑦᑎᐊᔪᓴᐃᓐᓇᒍᓐᓇᕐᓂᖏᓐᓄᑦ ᑕᕆᐅᒥᐅᑕᓂᒃ, ᓄᓇᒥᐅᑕᓂᒡᓗ ᐆᒪᔪᕆᔭᐅᔪᓂᒃ ᑕᐃᑲᓂ ᕿᑭᖅᑕᐃᑦ ᐱᓕᕆᐊᕆᔭᖏᓐᓂ, ᐊᑐᕐᓗᑎᒃ ᖃᕆᑕᐅᔭᓕᖕᓂᒃ ᑕᐃᔭᐅᔪᒥᒃ SIKU-ᒥᒃ ᓴᓇᔭᐅᓯᒪᔪᓂᒃ ᓴᓂᑭᓗᐊᕐᒥᐅᓄᑦ ᖃᐅᔨᓴᕈᑎᓂᒃ ᑐᔪᐃᔪᓐᓇᐅᑎᓕᖕᓂᒡᓗ. ᖃᐅᔨᒋᐊᑎᐊᒃᑲᓐᓂᕈᒪᒍᑦ ᑕᒪᒃᑯᐊ ᐊᑐᖅᑕᐅᕙᖕᓂᖏᓐᓂᒃ, ᐅᓇ ᓇᕿᓪᓗᒍ